- ГÆВЗ
- Мæгуырдзинады, мæгуыргæнæг бардуаг. Ис ыл сæрмагонд аргъау. Хуынгæ дæр афтæ кæны «Гæвз». Дыууæ æфсымæры фæйнæ хъæуы цардысты, иу – хъæздыгæй, иннæ та – мæгуырæй. Иу хатт иу стыр бæрæгбоны мæгуыр æфсымæр хъæздыгмæ фæцыд æмæ йын загъта: «Ме 'фсымæр, ацы стыр бæрæгбоны дæм уымæн æрцыдтæн, кæд мæ хорз фенис!.. Махсымæйæ мæ фæхынц». «Дæ аккаг махсымæ дæ разы къуыстилы, нуаз, цæй бæрц дæ хъæуы, уый бæрц!». Къуыстилы та уыдис дон.Мæгуыр æфсымæр дон банозта æмæ мæстджынæй рараст сæхимæ. Фæндагыл йæхицæн Уастырджийы зарæг кæны. Хъусы æмæ йын чидæр зæрдиагæй хъырны, фæлæ йæ нæ уыны.– Чи дæ, чи? Чи мын хъырны, уый? – фæрсы,– Æз, Гæвз, мæгуыры æмбал.– Æмæ ныр кæдæм цæуыс?– Демæ цæуын, демæ. Иууылдæр демæ хæтын.– Æз куыддæр хъæмæ бацæуон, афтæ мæлгæ кæндзынæн.– Гъе мæ æз дæр демæ!..Мæгуыр æфсымæр куыддæр йæ хæдзармæ бахæццæ, афтæ марды чырын аразынмæ фæци. Куы йæ скодта, уæд дзуры:– Ныр мæ чырын цæттæ у, æмæ мæлгæ кæнын... Гæвз, о, Гæвз! Ды дæр мемæ цæуыс мæрдтæм?– Уæдæ цы æнхъæл дæ?– Уæдæ тагъд ныххиз чырынмæ, – стæй йæ бафарста – Гæвз, о, Гæвз, чырыны дæ?– О, ам дæн, рацу ды дæр!Мæгуыр тагъд-тагъд чырыны сæр ахгæдта, зæгæлтæй йæ фидар ныххуыдта æмæ йæ уæлмæрды баныгæдта. Æмæ уæдæй фæстæмæ хъæздыг кæнын райдыдта. Йæ хъæздыджы кой дардыл куы айхъуыст, уæд æм йе 'фсымæр хæлæг кæнын райдыдта. Æрбацыд æм æмæ йæ фæрсы, цæмæй афтæ схъæздыг дæ, зæгъгæ. Уый йын йæ хæларæй радзырдта, Гæвз – мæгуыргæнæгæй куыд фервæзти, уый.Хæлæг æфсымæр ацыд уæлмæрдмæ, скъахта Гæвзы чырын, йæ сæр ын сæгом кодта. Гæвз ныдздзынæзта чырынæй, мæлын, зæгъгæ. Æфсымæр æм дзуры: «Цом ме 'фсымæрмæ, уый ныр тынг хъæздыг у, æмæ йæ фæмæгуыр кæн!»– Нæ! Æз демæ цæуын. Уый мæ бынтон амардзæн – Гæвз хъæздыг æфсымæрыл бафтыд æмæ йæ фыдмæгуыр фæкодта.
Словарь по этнографии и мифологии осетин. 2014.
